रविबार जन्मफल
शूरोऽल्पकेशो विजयी रणाग्रे श्यामारुणः पित्तचयप्रकोपः ।
दाता महोत्साहयुतो महोजा दिने दिनेशस्य भवेन्मनुष्यः ॥१॥
आइतबारमा जन्मलिने व्यक्ति बढी तेजस्वी, थोरै कपाल भएको, पित्तप्रकृति भएको, उत्साही, दानदाता, कुनै पनि कार्य गर्नमा साहसी, शूरो हुने, चारित्रिक शुद्धता भएको, उच्च पद प्राप्त गर्ने, यश पाउने, नानाप्रकारका सम्मान, पुरस्कार पनि उक्त बार जन्मेको व्यक्तिले प्राप्त गर्दछ ।
……………………………………………………………
सोमबार जन्मफल
प्राज्ञः प्रशान्तः प्रियवाग्विधिज्ञः शश्वन्नरेन्द्राश्रयवृत्तिवतीं ।
सुखे च दुःखे च समस्वभावो वारे नरः शीतकरस्य जातः ॥ २॥
सोमबारमा जन्मेको व्यक्ति गोरो वर्ण, पण्डित, शान्तस्वभाव, प्रेयवक्ता, छोटो कद, चतुर, कामुक, विद्वान्, विदेश यात्रा बढी गर्ने, सुखदुःखमा समान दृष्टि राख्न सक्ने, यशस्वी सुखमय जीवन व्यतीत गर्ने हुन्छ ।
……………………………………………………………
मंगलबार जन्मफल
वक्रोक्तिरत्यन्तरणप्रियः स्यान्नरेन्द्रमन्त्री च धरोपजीवि ।
सत्त्वान्वितस्तीव्रतरस्वभावो दिने भवेन्नावनिनन्दनस्य ||३||
यसबारमा जन्मेको व्यक्ति साहसी, रुखोबोल्ने, सत्वगुणी, तीक्ष्णस्वभाव, युद्धप्रिय, भूमिबाट जीविका गर्ने, कर्मठ, लगनशील मनमा लिएको अभिलाषा पूरा गर्ने, शत्रु पराजित गर्ने, सच्चरित्रवाला हुन्छ ।
……………………………………………………………
बुधबार जन्मफल
सद्रूपशाली मृदुवाग्विलासः श्रीमान्कलाकौशलतासमेतः ।
वणिक्क्रियायां हि भवेदभिज्ञः प्राज्ञो गुणज्ञो ज्ञदिनोद्भवो यः ॥४॥
यसबारमा जन्मेको व्यक्ति चंचल स्वभाव, प्रभावशाली, कलाकौशलमा निपूर्ण, मीठोबोल्ने, धनवान्, पण्डित, गुणज्ञ, कामुक, विद्वान, साहित्यप्रेमी स्वार्थ साधन गर्ने प्रयत्न गर्ने विपरीत लंगीमा प्रभाव राख्ने हुन्छ ।
……………………………………………………………
विहीबार जन्मफल
विद्वान् धनी सर्वगुणोपयन्नो मनोरमः क्ष्मापतिलब्धकामः ।
आचार्यवर्यश्च जनः प्रियः स्याद् वारे गुरोर्यस्य नरस्य जन्म ॥५॥
विहीबारमा जन्मेको व्यक्तिको वर्ण गोरो वा गहुँगोरो हुने, विद्वान्, सुन्दर, सिद्धि गर्ने, धनी, सर्वगुणले सम्पन्न, गुरुजनको
प्रिय, लोकमान्य, छोटो गर्दन हुने, काममा चतुरताका साथ कार्य सम्पन्न गर्ने, कामबासनामा लिप्त भएको, विद्वान् सबैको प्रियपात्र हुने, विदेश यात्रा बढी गर्ने वा बढी इच्छा गर्ने तथा साधन स्रोत नभए पनि धैर्यतामा विश्वास गर्ने हुन्छ ।
……………………………………………………………
शुक्रबार जन्मफल
सुनीलसत्कुञ्चितकेशपाशः प्रसन्नवेषो मतिमान् विशेषात् ।
शुक्लाम्बरप्रीतिधरो नरः स्यात्सन्मार्गगो भार्गववारजन्मा ॥६॥
यसबारमा जन्मेको व्यक्ति कालो कपाल भएको र घुम्रीएको, प्रसन्नमुख, अतिबुद्धिमान, सेतो वस्त्रलाई मनपराउने, सत्मार्गी, कलाप्रेमी, यशस्वी, समाजबाट सम्मान प्राप्त गर्ने हुन्छ ।
……………………………………………………………
शनिवार जन्मफल
अकालसम्प्राप्तजराप्रवृत्तिर्बलोज्झितो दुर्बलदेहयष्टिः ।
तमोगुणी क्रौर्यचयाभिभूतः शनेर्दिने जातजनुर्मनुष्यः ॥ ७ ॥
यसबारमा जन्मेको व्यक्ति तेजस्वी, साहसी, जवानीमा नै शिथिलता भएको अनुभव गर्ने, सच्चरित्रवान्, उच्च पद प्राप्त गर्ने क्रोधी, कामुक, दुष्ट, कुचक्री, तामसी, दुष्ट अपराधी जीवन बिताउने हुन्छ ।
